Blogs

Christmas hi kan hrang ah ziang a si?

Posted by salaihute on December 11, 2011 at 1:00 AM

 

Christmas hi kan hrang ah ziang a si? ( what does Christmas mean to us? )

 

Bawi Jesuh hi leitlun a rung tum lai ah Judah miphun pawl hi rundam an tul lai fang a si. Asinan a rung tum ngai ngai ah cun thlarau lam runtu hnak in taksa le ram runtu ding ah an rak duh sawn. Siangpahrang inn ih suak ding kha caw kuang ret nak a niam bik ah a rak suak. Mi fim, mi lian le politics thiam pawl thawn pawl lo in mi farah, rukru, misual le hlawhhlang pawl thawn a pawl sawn. Bawi Jesuh kha thlarau rundamtu ding ah an rak ruat lo. A tul tla an ti lo. An fimnak le an thiam nak in a tlin ko ding van ram kai nak ah a dang a tul lo tin an rak ruat.

Tu kum ah Jesuh kan hnen ah a rung suak lala. khua hlan bang in Bawi Jesuh kha hmai ton in kan el lo nan kan thin lung le kan ruat nak in kan el. Hi leitlun thilri pawl in kan nunnak in luah khat tuk ih suak kan tum nawn lo. Judah mi pawl bang in Bawi jesuh kha kan nun nak ih Bawi ngai ngai si ding ah kan duh lo. Kan duh vek in kan nung duh sawn.

Tu kum ah Jesuh in ziang si in dil? What does Jesus demands from us this year?

Judah pawl hi Pathian thei tu le dan thluntu pawl an si. Kan nih tla zumtu kan si ve. Christian sinak dan le dun pawl kan thei ve. Ziang si kan dang awk nak? Kan nih in Bawi Jesuh kha rundamtu ah kan pom. Judah Iscariot bang in hriam nam king in cozah do ding ah cun tu san ah a tul nawn lo. Sinan do tu cu kan nei ring ring. Jesuh kan lam tang in in do pi ve ding in kan duh. Kan ruat dan vek a si lo tik ah kan thin a heng ih kan riah a sia. Thil hmuah hmuah tuah tul lo le tha zang suah tul lo in tuah thluh thei sehla kan duh. Hnatuan tul lo in paisa tampi nei sehla, Lottery tla tampi ngah sehla kan duh. Kan duh nak vek in a cang lo tik ah depression kan ngah. Judah Iscariot bang in kan mah le kan mah tla that awk kan tum si lo sawm. Bawi Jesuh in kan thlarau lawng si lo in kan taksa tla run dam in duh. A mah bang in tuah mi kan si ih a mah vek in thinlung pumkhat le ruahnak pumkhat si ding ah a duh.

Christmas hi Bawi Jesuh ih suah ni (jesus’ birthday) a si lo, ziang ah tile Bawi Jesuh cu kan thinlung sung ah a um zo. Minung ah a rung cang mi (reincarnation) a si ih khai hlan ah a um cia mi a si. Bawi Jesuh in suahni (birthday) a nei lo. A nih cu alpha le omega a si. Kan thinlung sung ah a um zo. Wow!! a mak nasa ti uh law. Ziang ruang ah saw kan thinlung sung ah a um duh? Kan nih hi khua hlan ih Israel pawl thawn dang awk nak ziang hman kan nei lo. Sinan kan hnen ah Bawipa cu a um duh tho tho. Himi thu ah kan pastor Rev.Dr. Khaw Lian Uk ih thu sim mi ka run ngan ding.

“ Pathin cu minung ah a cang. John 1:4-6. Pathian hi minung ah a cang ti hi ka ruat tik ah a mak ka ti zet. Minung hi ziang ha kan si ruang ah Pathian in cutluk lawmamin in duh thei? Tahthim nak ka lo pe duh mi cu, Sinpi Hran Thang cu a piang tuk a mawi tuk ih Vancung fala Ai Thang Vel in a zoh tik ah a piang tuk ruang ah a mawi tuk ruang ah van lasi sinak tan ta in pitar vun a hruk ih lei tlun ah a rung tum ti a si. A nih Ai Thang Vel ( Van Lasi) in ziang ruang ah leilung ah a rung tu, ziang ruang ah ti le a mawi tuk mi Sinpi Hran Thang kha a ngai zawng ruang ah a si. Sinan Bawi Jesuh leitlun ah a rung tum timi cu ziang ruang ah si ti le kan mawi tuk ruang ah si lo. Kan nih vek Bawipa in in duh ih leitlun ah minung a can paih hi mang bang za a si. Curuang ah a mah thangthat ring ring ding kan si. Kan nih vek minung pawl van Cannan thleng thei ding ah a har bik mi thihnak tuar ding ah Jesuh Khrih cu a rung tum a si. Pathian hmin thangthat in um seh. Kan mah hnen ihsin ziang ha a lak ding ih kan mah hnen ihsin ziang si a duh mi a um? Kan nih ihsin ziang si seherh thluah thloh in leitlun ah a rung tum ti sile, a nih hi a seherh bik mi cu ziang ha ti a si le, hitin tah thim nak kan lak ta ding. Unauza kan um ih kan lak ihsin a tontai bik hi ka nu in a seherh cuang. Midang cu kan dam, kan cak, kan suk kan so thei . ka nu in nan nau tabik hrang ah tla ruat ve uh maw in ti ring ring. Kan lak ihsin a ton tai bik hi ka nu in a seherh bik a si. Cuvek in kan nih tla hi kan nih khal hi Bawipa in in tan ih hell ram kan thleng ding hi in siang lo. Kan mawi kan that ruang ah si lo in a zangfah nak sawn ruang ah leitlun ah minung sinak cang in thihnak hrial thei mi a si ko nan hrial lo in a duhdawtnak sawn in leitlun ah a rung tum nak a si. Curuang ah Pathian hi minung a cang timi hi nang mah le kei mah in duhdawttuk ruang ah a si. Cumi in duhdawt a si ti thei in, Jesuh Khrih in in duhdawt ruang ah kan mah hrang a thi ti kha pianthar nak a si. Van kai nak a si. Mi piangthar le piang thar lo kan dan awk nak hi mi piang thar in kawl kan ur thei sawn ruang ah si cuang lo. Tong kan an thiam, khabeh sep an thiam ruang ah si lo. Bible tla an siar ih kan hmuh lo mi kha an hmu thei ruang ah si cuang lo. Mi piang thar pawl hi ziang ruang ah an piang thiar ti se le cun kei cu ziang hman ka si lo ih Jesuh cu ka hrang ah a thi si ti hi zum tawp kha pian thar nak a si. Curuang ah leitlun ah a rung tum nak a si kha john bung 6 sung ah tha ten kan hmu thei.

11 sung ah cun minung ah a rung cang nan Jesuh an co hlang lo timi kan hmu thei. Himi hi ka ruat thew, khai san lai ih Judah pawl lawng si lo, tuisan khal ah Christian ka si ti aw cing khal in Jesuh an co hlang lo mi tam pi an um. An khawm thew, hla an sak ve, mihnen an um thew ko nan a tak tak ah cun, Jesuh an nunnak ih a vun luah khat ngai ngai ding si ah cun, an nunnak ih Bawi ngai ngai a si tak tak ding cun nan cu um hrih aw, nan cu um hrih ko aw an ti. An nunnak kha Jesuh hnak in thupi sawn ah an ret. Kan nunnak hi Jesuh hnak ih thil thupi sawn kan ret mi a tam a si ah cun Jesuh kan nunnak ah a um nan kan hna a ngam thei lo. Jesuh ih man that zia, a sunlawi zia le a tha zia kan theih ngah hnu lawng ah ka bawi a si ti kan thei thei. Jesuh lawng hi kan hrang ah a thu pi bik a si. Jesuh nei tu kan si hi mi van tha bik kan si. Jesuh hi mi men men a si lo. Nisuak nak ih mifim pawl in an buak pi mi, leitlun mi ih buai pi mi Jesuh kan hnen ah a um a si”.                 (Salaihute tei inn ah mino bible study kan tuah lai John bung 1 nak kan rel khawm lai ta lak mi a si.)

Jesuh kan sung ah a um maw? Tukum Christmas ni ah Jesuh hi a thu pi bik maw? Kum liam cia bang in nuam cen nak sung ah maw kan um lai? Bawi Jesuh kan hrang ah a suak maw? Tikcu in mi a hngak lo tu hi can tha bik a si. Bawi Jesuh cu kan hrang ah kan thinlung ah a suak zo. Zum awla rundam na si ding.

Pathian hmin thangthat in um ko seh.

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

Already a member? Sign In

0 Comments