Blogs

Pathian in hngak hrih aw in ti.

Posted by salaihute on December 26, 2011 at 6:15 PM

Kan tulcan te it thil kan ngah thei lohli lo ih kan hngak hi a har zet ka ti. A can can le minute 5 te hngak khal hi a rei thei zet. Harsat kan ton can ah, Pathian kan tul zet can ah thla kan cam kan ko rero nan Pathian in hngak hrih aw in ti. Cuti vek can ah kan nih cun answer ngah mei sehla kan duh. Sihmansehla Bawipa in Saam hlabu sung ah hitin a ti. 

Saam 27:14 Bawipa cu hngak uh; cak uhla, raltha in um uh; Bawipa cu rinsan uh.

Pathian in hngak hrih aw in ti tik ah kan um nak kel, kan tuah mi kel te kha tuah rero in Pathian in ziang si a duh, ziang mi si a tumtahmi ti kha hngak ding a si.

Ziang ruang ah Pathian in hngak hrih aw in ti?

Harsatnak kan ton can, thil kan tul zet can ih hngak hi a har zet cuang. Sinan Pathian in kan thlacam hi ziang ruang ah in amen hrih lo ti hi kan theih fiang a si ah cun a mah kan zum thei ding ih a mah ih can kha kan hngak htei ding. A can can le hmai ah feh vivo ding hi kan ngam lo, Pathian in kan hrang ah tumtah nak a nei. Sinan cui tumtah nak hmun thleng thei ding ah kan thinlung, kan ruah nak a dik lo mi pawl,rem sal ding ah in cawl ter ih chance in pek. Sual kan tuah mi pawl silo len ruah nak tha lo kan ruat mi pawl lo len thil tha lo kan tuah mi pawl kha rem ding in Pathian in a duh. Kan nun hlun kha tanta in nun thar thawn feh ding kha Jesuh in a duh mi a si.

David cu siangpahrang si ding in a nauhak lai ihsin hriak thih asinan, can tampi hramlak sung ah Saul kut sung ihsin tlan in a um. Harsatnak phun kim sung ihsin David kha training a pek rero. Hotu pakhat si ding ah a rem rero. Pathian hnen ah rinsan nak a nei vivo ih ziang kim a tuah tik ah Pathian kha a rawn ta ring ring. Pathian thu lo in ziang hman a tuah lo. Can a kim tik ah Pathian in siangpahrang si nak tohkham cu a pek.

David vek ih kan nih tla Pathian in training tampi in pek ve. Kan hnatuan nak ah boring tuk maw, a mah kan rinsan lo mi kha rinsan ding in, a mah kan rawn lo mi kha a mah rawn ding in harsatnak hmun ah in ret. Sinan nikhat ni ah a tumtahnak hmun ah in thlen pi ding a si. A thlawsuah tampi in pek ding a si. 

Kan zumnak in thang so ter.

Kan duhmi hmuah hmuah in pek thluh sehla a mah kan rinsan nawn lo ding. Zumnak in kan feh nawn lo ding. Abraham vek in Pathian nih ka lo pek ding timi kha kan hmu thei lo khal len zum ding a si. Pathina in a thukam mi a pelh dah lo.

Ziang tin kan hngak ding?

Ka nau Mee Nge sizung ah nau neh ding in a um lai ah hngak nak hmun ( waiting room ) in ka rak hngak. Tunu te Pathian in in pek ding timi zumnak thawn ka rak hngak. Cuvek thiam thiam in kan nih tla Pathian hnen ah kan thin lung hawi in waiting room in kan hngak ve a tul. 

Thin saute, daiten le rinsan ten hngak aw. Hi pawl hi Pathian ih thu ngai tu pawl hrang lawng a cang thiei mi a si. Pathian in kan thatnak le kan hrang ih a tha timi lawng a tuah timi kan thinlung sung in thei sehla, a tikcu le a can kim tikah a thlawsuah kan co leh ding ti hi kan zumnak a si. Pathian thu sung ah kan nemhnget a tul. Bible hi kan nunnak ih lamhruai tu a si. Nitin ten Bible kan siar ding ih a duh zawng kha bible sung ihsin in lang ter dingih, a dik nak lamzin kan thlun thei ding.

A mah rinsan in confident nei zet in kan hngak ding. Pathian hnen ah kan ap aw hnu, a duh zawng in kan nun kan hlan hnu cu a ma kha confident nei zet in kan rinsasn thei. Ziang tik ah ziang tuah ding hi a thei tuk mi Pathian a si. A duh zawng in thilcang ding in a tuah ring ring. Kan nih ih kan tuah ding mi cu a mah kan zum ding ih a mah lam in hruai ding kha thei hi a si.

Can tawite sung lawng kan hmu thei.

America a fast food a tam tuk. Drive thru le zamrang ten check-out tuah thei nak a tam tuk. Traffic ah minute malte sung hman kan hngak peih lo. Ziang kim hi a rang theibik in kan duh. Kan thlarau hrang cun cuvek rang kha a theih nawn lo. Pathian in a tikcu ah thil a tuah ding tin a mah kha rinsan ding in Pathian in a duh. Pathian hnen ah rawn lo in minung le a dang dang hnen ah kan rawn. Lamzin na hlo tik ah minung pa 3 hnen ah direction dil awla phunthum in an lo sim ding. Minung ih kan ruat nak cu an bang aw thei dah lo. Minung cu kan rawn a tul can tla tampi a um ko nan Pathian kha hmasa bik ah ret in a mah rawn ring ring ding kan si. A mah lawng ih thil hmuahhmuah a thei a si. Pathianin in hngilh a si ding, tutiang ziang hman in sim hrih lo tin kan ruat can te ah Pathian cu kan kiang ah a um ring ring a si. 

2 sansiarnak 16:9 Bawipa cun a mah rinsannak thinlung a neitu hnenah thazaan cak pe dingin leilung pumpi hi a zoh ringring a si.

Kan hngak ruang ih thiltha kan nga mi.

Kan lamzin a tluang ding ah le kan tul mi pawl in pek ding ah Pathian kan hngak tikah ziang ha kan ngah? hmaisabik ah thinsau ten a hngak tu pawl ih thlacam cu Pathian in a thei. Saam 40:1 Bawipa bomnak cu ka hngak ringring. Cule i run ngai ih ka aunak a thei. Cule ziang tuah ding mi fiang ten a im cu rin an nih in an thlun thei ding.

Saam 25:4-5 Mawi Bawipa, na lamzin i zirh aw; Na lamzin cu i theih ter hram aw. Na thudik vekih nung dingah i zirh aw; ziangah tile nangmah cu i ruutu na si. Sunvu te nangma ka lo hngak.

Kan zumnak in hnget ter. Thiltha kan tuah suak tikah kan mah le kan mah kan rinsan aw ih kan zumaw zet. Cuti vekih Pathian in a hnen ah rinsan ding in duh. Ziang si in sim duh, ziang si a duh zawng tihi ngai ring ring ding kan si. Cutin kan um tik ah mi hmuahhmuah ih pek thei lo mi hnangam nak, lungawi nak, cahnak pawl Pathian in in pek ding a si. Pathian cu a thu kam mi pawl a siat dah lo ih, a mah a arinsan tu pawl hrang ah thil tha a tuah ring ring a si. 

Isaiah 49:23 Siangpahrang pawl cu nan hrangah pa bangtuk an si dingih, siangpahrang bawi pawl cu a lo tuamhlawmtu nan nu bang tuk an si ding. Nan hmaiah an lu an kuun dingih a lo tihzah ding. Cutiah kei mah bu Bawipa ka si kha in thei ding; keimah bomnak a hngak tu pawl cu an bei dong lo ding, tiah a ti.

Pathian in thlawhsuah in pek hram seh. zumnak in nghak uh si. Amen!

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

Already a member? Sign In

0 Comments