Blogs

Semtirnak bung 14 rel khawm mi ka lo hlawm.

Posted by salaihute on January 21, 2012 at 11:35 PM

Pu Thu Mawi tei inn ih bible study kan tuah mi ka lo hlawm ve. 1/21/2012 8:00 pm to 9:30 pm.

Tuzan bible study cu Semtirnak  bung 14 a si ih kan hlawk nasa. Thazang ka ngah mi te lo hlawm ve ka duh. Lot cu a mah duh zawng lawng zoh in Pathian ih duhzawng a zoh nawn lo ruang ah a um nak ah harsatnak lawng in a khat. A mit ih hmuh thei mi lawng hi tha tawk ah a ruat. Sodom le Gomorrah khua cu mit hmuh ah cun an tha zet nan nikhat ni ah cun a hlo ral thluh. Nitin kan nunnak ah hril ding tam pin kan nei ve. tusan ah Sodom khua cu kan thin lung a si. Kan hril sual ih buai nak le harsatnak kan tong ah cun Pathian hnen ah kan sir aw sal ding ih lungawinak kan ngah sal ding.

 

Lot cu a pu Abram a hlun ring ring ih thlawsuah a nga ring ring. A pu hnen ihsin a tlan veten harsatnak le buainak a tong cih. Nitin kan nunnak ah Pathian thawn kan feh tlang a si ah cun kan lam a tlung ring ring ding. a mah hnen ihsin kan tlan cun harsatnak in kan nun a khat ding. Melchizedek hi Pathian in puithiam a si ih Siangpahrang tla a si. Abram in then hra then khat a pek ti kan hmu thei. Then hra then khat hi Pathian ih ta a si ih Pathian hnen ah pek ding kan si. Siang bawipa in hitin a ti dah. Nikhat ah Van Lasi hrang ah peanut pawl cabuai par ah ka ret. Cumi sung ihsin pakhat a lak ih kei mah in pek. Cumi in pek mi te hi ka lung awi zet. Pathian tla cu vek a si ve. Kan neih mi sung ihsin then hran then khat te kan pek kha a lung a awi tuk.

 

Abram in Lot a run ti kan hmu thei. Siangpahrang pali pawl in Sodom an lak hnu ah Abram in a va feh in pacang hlir 318 thawn an va do tik an neh. An ral pawl cu an tam zet nan Abram hnen in tang tu pakhat cu an zaten hnak in a tam sawn. Cumi cu Pathian a si. Tu tla hi kan hnen ih tang tu Pathian cu leitlun hnak in a cak sawn a si.

Pathian thawn pawl kom aw tu cu thlawsuah tam pi an tong ti thu hi cabu sung in kan hmu thei. Tuzan ah Pathian thu ngai ding in kan ra pawk cio tik ah Pathian in thlawsuah tampi in pek a si ti mi kan hmu thei. Lot le Sodom khua bang in leitlun nuam nak ah minung tam pi cu an tlan leng rero ih buainak an tawng rero lai a si. Hmai lam ah teh zo ha na hril sawn ding.

 

Cule Kan pastor Uk ih a sim mi pakhat ah, Berian mi pawl cu thuthang tha sim tu pawl an rat tik ah thu dik an sim maw sim lo ti thu kha bible tha ten an zing zoi ta ring ring ti kha a si. Kan nih tla Pathian thu kan ngai tik ah thusim tu pawl ih sim mi kha a dik maw dik lo ti kha bible thawn check ring ring a tul. Berian mi pawl cun Pawl ih thu sim mi khal bible pawl a kaih le kaih lo an check fing fing a si ti kan hmu thei. Curuang ah Pahtian thu ra sim tu hmuah hmuah kha a nih cu a tha zet, a nih tla a tha tho tho ti ding kha si lo ih bible thawn check fing fing ding a si.

 

Tuzan midang pawl an tlun hnu ah Dr.Ting Htay ih Genesis bung 3 zirh nak malten ka vun ngai ih Eden sung ih a um mi hmuah hmuah hi a tha thluh a ti. Even a tree of good and evil hman hi a tha tin a zirh. Cumi lawng si lo in kan Pastor Uk thuzirh mi pawl hi a sual tin a ti cu teh. A tlun ih ka ngan mi pawl ah a sual mi a um maw? Pathian thu lawng lawng si lo sawm. Minute pahra te sung ka vun ngai hman ah zirh sual ti thu ka thei cih.

 

Bible kan check ding fing fing hi a va tul so. Kan ti rero bang in zirh sual pawl hi an va tam so. Pastor Pa Uk ih a ti bang thu thang tha sim tu, van ram thu sim tu pastor kan neih hi a va sung lawi so. Hmaizarh len Pastor Uk tei inn ah a si ding ih Thukam thar bung 15 kan zoh khawm ding. zaten ra pawk cio ding in ka lo sawm.

 

Pathian hmin thangthat in um ko seh

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

Already a member? Sign In

0 Comments